PAPA

For Franky Manangkot papaku tersayang

oleh

Novinda Frandiani Manangkot 

With papa :)

 

 

Dia selalu bakerja tiap hari

Dia beking samua apa yang boleh mo jadi doi

Dia ba jual sayor

Dia ba ojek

Dia ba kerja kobong

Dia ba beking orang pe lampu

Dia ba tarek odong-odong

Dia nda pernah brenti ba kerja tiap hari

Dia bangon pagi-pagi

Ayam masih manganto dia so bangon

Dia se panas tu dia pe motor 3 roda

Dia nda pernah smokol

Dia langsung pigi ka pasar

Dia ba jual sayor deng ikang kaliling kampung

Dia ba ojek baron tondano

Dia ba tarek odong-odong putar-putar mo cari panumpang

Dia berusaha prong dia pe motor gaga supaya banyak anak-anak mo nae

Dia so pasang atap

Dia so pasang lampu mati idop mati idop

Mar sayang dia pe motor belum ada lagu

Dia so baron ba cari panumpang mar nda ada yang mo nae karna nda ada lagu

Dia pulang nda bawa doi

Dia dapa lia sedih mar dia nda pernah bilang dia kecewa atau dia lelah

Dia  cuma tatawa nda dapa panumpang

Dia bilang,”Nda ada lagu kwa jadi nda ada tu mo nae”.

Qta sayang skali pa dia

Dari qta kecil sampe qta so nona-nona bagini dia nda pernah brenti ba kerja

Dia cari doi for qta,adek,deng mama

Dia nda pernah malo

Dia ba jual sayor deng ikang mar banyak tu ba utang

Dorang ba utang pa dia mar kalo mo ba beli pa orang laeng

Dia nda pernah malo mo pake dia pe motor 3 roda for mo ba tarek odong-odong

Yang penting dia boleh dapa doi dia nda pernah malo

Qta sayang skali pa dia

Biar kadang-kadang qta marah pa dia

Qta kecewa pa dia

Qta binci pa dia

Mar qt tetap sayang pa dia

Qta nemau dia saki

Qta nda suka dia orang tatawa akang

Biar jo ngoni hina pa qta mar jangan dia

Qta sayang pa dia

BIar dia jarang ja pigi ibadah

Mar jangan ngoni mo hakimi pa dia

Dia yang da se makang pa qta

Dia yang da se ajar pa qta

Biar samua orang mo pandang enteng pa dia

Biar samua orang mo tatawa akang pa dia

Qta bangga skali pa dia

Qta sayang pa dia

Dia qta pe papa

Qta pe hidop

Qta pe darah

Qta sayang papa